મુંબઈ : ડોક્યુમેન્ટરી ફિલ્મનું વિરોધી શું થાય? મોક્યુમેન્ટરી.મુંબઈમાં દર બે વર્ષે યોજાતા ડોક્યુમેન્ટરી,શોર્ટ ફિક્શન અનેે એનિમેશન ફિલ્મોત્સવની સત્તરમી આવૃત્તિના બીજા દિવસે ફિલ્મ રસિયાઓને દિગ્દર્શક પ્રિન્સ શાહે મૂન ઓન ધ મેન ફિલ્મ દ્વારા આ નવા સ્વરૃપનો પરિચય કરાવ્યો હતો.દક્ષિણ મુંબઈમાં લગભગ ફૂટપાથ પર રહેતા બે સિનેમા લવર્સના ભૂતકાળમાં ડોકિયું કરાવવાના બહાને ભ્રમ શું અને વાસ્તવ જેવા ગહન મુદ્દાની હળવી શૈલીમાં થયેલી રજૂઆતને કારણે દર્શકોને આ ફિલ્મ જોવાની મજા પડી ગઈ હતી.ગલી બાય અને ટેનેટ જેવી સફળ ફિલ્મોમાં સહાયક નિર્દેશક તરીકે કામ કરી ચૂકેલા પ્રિન્સ શાહે પ્રાકલાન અને શૈલેશ થડાનીના વાસ્તવિક પાત્રો દ્વારા લાઈમલાઈટ ફેંકાતી બંધ થયા બાદ મુંબઈમાં જીવન ટકાવી રાખવા માટે કેટલી જદ્દોજહદ કરવી પડે તેનો ક્ર ચિતાર રજૂ કર્યો છે તો સાથે સાથે ફિલ્મ બનાવતી વખતે લોકો સાચું બોલે છે તે ચકાસવા ફિલ્મ નિર્દેશકે કેવા પ્રકારની કસોટીઓમાંથી પસાર થવું પડે છે તે પણ દર્શાવ્યું છે.
તો બીજી તરફ ઓસ્ટ્રેલિયાની ફિલ્મ સર્કલ ઓફ સાયલન્સમાં ચેનલ સાતના પાંચ પત્રકારોને ઈસ્ટ ટિમોરમાં ૧૯૭૫માં કેવી રીતે હણી તેના પર કેવી રીતે ઢાંકપિછોડો કરવામાં આવ્યો તેની વાત પત્ની શર્લીની લડત દ્વારા રજૂ થઈ છે.જીવનમાં ૮૦ના દાયકામાં પત્રકાર પતિના મોતના રહસ્યને ઉકેલવાના શર્લીના પ્રયાસો સ્તબ્ધ કરી મૂકે છે.આંતરરાષ્ટ્રીય સ્તરે ક્ડ આઇલ મેળવવા યુએસ સરકારે કાંડમાં ઈસ્ટ ટિમોરમાં કરવામાં આવેલા સંહારને લગભગ ભૂલાવી દેવામાં આવ્યો છે પણ આ ફિલ્મમાં શીતયુદ્ધની વરવી વાસ્તવિકતા છતી કરવામાં આવી છે.ફઝીલ રઝાકની મલયાલમ શોર્ટ ફિક્શનમાં હિજાબના મુદ્દે રજૂઆત કરવામાં આવી છે.મહિલાઓ હવે બુરખા પહેરવાને બદલે શહેરોમાં જઈ પોતાના ભાગ્યને અજમાવી લેવાનું વધારે પસંદ કરે છે.કિગઝ ફિલ્મ આલુ કાચુ-એટલે જે મળે તે લઈ ભાગો-માં પણ દિગ્દશકા મારિયા બ્રેન્ડેલે આ જ વાત રજૂ કરી છે.આ ફિલ્મમાં સેઝીમ નામની યુવતી શહેરમાં ભણવા માટે જાય છે ત્યાં તેનું અપહરણ કરી જબરદસ્તીથી લગ્ન કરી દેવામાં આવે છે પરંતુ તક મળતાં જ સેઝીમ પતિની રેઢી પડેલી કારની ચાવી હાથમાં આવતાં જ શહેર ભણી ભાગી છૂટે છે.ટૂંકમાં કહીએ તો નવીપેઢીની યુવતીઓ સ્વતંત્રતા મેળવવા પરંપરાગત સમાજને ત્યજી રહી છે.તો બીજી તરફ પાલિશ ફિલ્મ ધ ડ્રેસમાં ઠીંગણી યુવતી જુલિયાના પ્રથમ જાતીય સંબંધની વાત કરવામાં આવી છે.જેમાં ઠીંગણી વ્યક્તિઓની એકલતા અને તેમના વિશે સમાજમાં પ્રવર્તતા પૂર્વગ્રહની વાતને સંવેદનશીલ રીતે રજૂ કરવામાં આવી છે.આજે રજૂ થનારી રસપ્રદ ફિલ્મો મુંબઈના જાણીતા ફિલ્મરસિક રશિદ ઈરાનીનેે શ્રદ્ધાંજલિ આપતી રફિક ઈલિયાસની ફિલ્મ ઈફ મેમરી સર્વઝ મી રાઈટ ઓડિ ૨માં બપોરે બાર વાગ્યે દર્શાવાશે.કેનેડાની જેનેટ પર્લમેનનો એનિમેશન રિટ્રોસ્પેક્ટિવ આરઆર થ્રીમાં સવારે ૧૧.૩૦ વાગ્યે અને બપોરે બે વાગ્યે આઈસલેન્ડિક એનિમેશન ફિલ્મો દર્શાવવામાં આવશે.
