– દેશના અનેક જીલ્લાઓમાં છૂટછાટ મળે એવી સંભાવનાઓ
નવી દિલ્હી,
કોરોના મહામારી સામે દેશવ્યાપી લોકડાઉન-2 આગામી 3મેના રોજ પૂર્ણ થઇ રહ્યુ છે.જો કે સતત વધી રહેલા કોરોનાના કેસો વચ્ચે સરકાર 3મે પછી લોકડાઉનને લઇને શું નિર્ણય લેશે એની પર સમગ્ર દેશ નજર માંડી બેઠો છે.
ખાસ બાબત એ છે કે બુધવારે ગૃહ મંત્રાલયે જાહેરાત કરતા જણાવ્યુ છે કે કોરોના મહામારીને મુદ્દે સરકાર આગામી 4 મેના રોજથી દેશભરમાં નવી ગાઇડલાઇન લાગૂ કરવામાં આવશે.સરકારના નવા દિશા-નિર્દેશ લાગૂ થયા પછી દેશના અનેક જીલ્લાઓમાં મોટા પ્રમાણમાં છૂટછાટ મળવાની સંભાવનાઓ વ્યક્ત કરવામાં આવી રહી છે.
3મેના રોજ ખતમ થઇ રહેલા લોકડાઉન મુદ્દે ગૃહ મંત્રાલય પ્રવક્તાએ ટ્વીટ કરી જાણકારી આપી હતી કે આ સંદર્ભે સંપૂર્ણ માહિતી આગામી દિવસોમાં આપવામાં આવશે.આ પહેલા સરકારે લોકડાઉન દરમિયાન અન્ય રાજ્યોમાં ફસાયેલા પ્રવાસી મજૂરો,પર્યટકો, વિદ્યાર્થીઓ સહિત તમામને વતન જવાની પરવાનગીના આદેશ આપ્યા હતા.
બીજી તરફ ભારતભરમાં કોરોનાના કેસો સતત વધી રહ્યા છે, તાજેતરના આંકડાઓ મુજબ વિતેલા 24 કલાકમાં દેશભરમાંથી 1813 નવા કેસ સામે આવ્યા છે જેના લીધે કેસોની કુલ સંખ્યા વધીને 31,787 થઇ ચૂકી છે આ દરમિયાન અન્ય 71 કોરોનાગ્રસ્ત દર્દીઓના મોત થવાને લીધે મૃત્યુઆંક પણ વધીને 1008એ પહોંચી ગયો છે.
