નવી દિલ્હી,
વીજ વિતરણ કંપનીઓ(ડિસ્કોમ કંપનીઓ)એ ફેબ્રુઆરી મહિનામાં વીજ ઉત્પાદકોને રૂ.92,693 કરોડ આપવાના બાકી નીકળે છે.એક વર્ષ પહેલાં ફેબ્રુઆરી 2019માં આ કંપનીઓએ વીજ ઉત્પાદકોને રૂ.70,706 કરોડ આપવાના બાકી નીકળતા હતા.આમ,આ રકમમાં 31 ટકાનો વધારો થઈ ગયો છે.ફેબ્રુઆરી 2020માં વીજ વિતરણ કંપનીઓએ વીજ ઉત્પાદકોને આપવાની બાકી રકમ 60 દિવસથી પણ વધુ સમયથી નથી ચૂકવી તેવી રકમ રૂ.80,616 કરોડ થઈ છે, જે ગત વર્ષે આ ગાળામાં રૂ.53,703 કરોડ હતી. આ રકમ ઓવરડ્યૂ એમાઉન્ટ કહેવાય છે.જાન્યુઆરી 2020માં ઓવરડ્યૂ એમાઉન્ટ રૂ.76,585 કરોડ હતી.
પેમેન્ટ રેટિફિકેશન એન્ડ એનાલિસીસ ઈન પાવર પ્રોક્યોરમેન્ટ ફોર બ્રિંગિંગ ટ્રાન્સપરન્સી ઈન ઈન્વોઈસિંગ ઓફ જનરેટર્સ(PRAAPTI) નામની પોર્ટલ પર આ આંકડા અપડેટ થતા રહે છે. તેના લેટેસ્ટ આંકડા અનુસાર જાન્યુઆરી 2020માં કુલ બાકી રકમ રૂ.88,859 કરોડ હતી.આમ,માસિક ધોરણે પણ તેમાં વધારો થયો છે. ખાનગી વીજ ઉત્પાદક કંપનીઓએ કુલ ઓવરડ્યૂના 25.42 ટકા રકમ લેવાની થાય છે.સરકારી વીજ ઉત્પાદક કંપનીઓએ 39.53 ટકા રકમ લેવાની બાકી નીકળ છે. બિનપરંપરાગત એનર્જી જેવી કે સોલાર અને વિન્ડ પાવર ઉત્પાદક કંપનીઓએ પણ ફેબ્રુઆરીમાં વીજ વિતરણ કંપનીઓ પાસેથી રૂ.7095.86 કરોડ લેવાના નીકળે છે.
ક્યા રાજયોનું સૌથી વધુ દેવું
રાજસ્થાન,ઉત્તર પ્રદેશ,જમ્મુ-કાશ્મીર,તેલંગણા,આંધ્ર પ્રદેશ,કર્ણાટક,તમિલનાડુની વીજ વિતરણ કંપનીઓનું વધારે દેવું છે.સરકારી કંપનીઓમાં એનટીપીસીએ રૂ.11,615.80 કરોડનું ઓવરડ્યૂ વીજ વિતરણ કંપનીઓ પાસેથી લેવાનું નીકળે છે. એનએલસી ઈન્ડિયાએ રૂ.5208.51 કરોડ,દામોદર વેલી કોર્પોરેશને રૂ.4920.39 કરોડ, એનએચપીસીએ રૂ.2842.75 કરોડ,ટીએચડીસી ઈન્ડિયાએ રૂ.2188.90 કરોડ લેવાના નીકળે છે.ખાનગી વીજ ઉત્પાદક કંપનીઓમાં આરકેએમપીએ રૂ.3421.68 કરોડ લેવાના નીકળે છે.અદાણી પાવરે રૂ.3201.68 કરોડ લેવાના નીકળે છે.બજાજ ગ્રુપની લલિતપુર પાવર જનરેશન કંપનીએ રૂ.2212.66 કરોડ અને જીએમઆરે રૂ.1930.16 કરોડ લેવાના નીકળે છે.
