ગાંધીનગર : શહેરનાં સુપ્રસિધ્ધ કાંકરિયા તળાવનું વડાપ્રધાન નરેન્દ્ર મોદીએ નવનિર્માણ કરાવ્યા બાદ કાંકરિયા લેકફ્રન્ટ તરીકે ઓળખાતું પરિસર ચોક્કસ વેપારીઓ-કોન્ટ્રાક્ટરો અને અધિકારીઓ માટે કમાણીનું સ્થળ બની ચૂક્યું છે. એટલે સુધી કે કાંકરિયા લેકફ્રન્ટની સફાઇનાં ટેન્ડર લેવા માટે ભાજપ નેતાઓની મહેરબાનીની જરૂર પડવા માંડી છે.આ બન્ને એજન્સીઓને બે વર્ષે બે કરોડ ૭૧ લાખથી વધુ રકમ ચૂકવાશે. કાંકરિયા લેકફ્રન્ટ પરિસર અને કિડ્ઝ સિટીના નિર્માણ બાદ તત્કાલીન મુખ્યમંત્રી નરેન્દ્ર મોદીએ મ્યુનિ.સત્તાધીશોને કાંકરિયાની જાળવણી કરવા તથા સ્વચ્છતાનાં ઉચ્ચ ધોરણો જાળવવાની તાકીદ કરી હતી.તેના પગલે મ્યુનિ.તંત્ર દ્વારા કાંકરિયા લેકફ્રન્ટ પરિસર અને કિડ્ઝ સિટીની મિકેનાઇઝ્ડ અને મેન્યુઅલ સફાઇ પાછળ વર્ષે દહાડે લાખો રૂપિયાનો ખર્ચ કરવામાં આવી રહ્યો છે.કાંકરિયા લેકફ્રન્ટ અને કિડઝ સિટીની સફાઇ કરાવવા માટે મ્યુનિ.કાંકરિયા લેકફ્રન્ટ ખાતા દ્વારા ઓક્ટોબર ૨૦૨૧માં ટેન્ડર બહાર પાડવામાં આવ્યા હતા અન તેમાં ટેકનિકલ બીડ મંગાવવામાં આવતાં ૧૯ જેટલી એજન્સીઓ(કોન્ટ્રાક્ટરો) મેદાનમાં ઉતર્યા હતા.આશ્ચર્યજનક રીતે સફાઇનાં કોન્ટ્રાક્ટ આપવા જેવી બાબતમાં પણ પોતાનાં માથે કોઇ જવાબદારી ન આવે તે માટે મ્યુનિ.કાંકરિયા લેકફ્રન્ટ ખાતા દ્વારા કન્સલ્ટન્ટ નિમવામાં આવ્યા હતા.જેને તમામ ટેકનિકલ બીડ મોકલી આપવામાં આવ્યા હતા.આ કન્સલ્ટન્ટનાં રિપોર્ટ બાદ પ્રાઇઝ બીડ ખોલવામાં આવ્યા હતા, જેમાં ૧૧ એજન્સીનાં ભાવ જોવાયા હતા.
કાંકરિયા લેકફ્રન્ટની સફાઇમાં મોટી કમાણી દેખાતી હોવાથી અમુક એજન્સીઓની રીંગ થઇ હોવાનુ લાગી રહ્યું છે.આશ્ચર્યજનક રીતે અમુક એજન્સીના ભાવ એકસરખા જણાઇ રહ્યાં છે.તેના પગલે સફાઇ કામગીરીમાં અને સફાઇ કામદારોને વેતન ચૂકવવામાં ગેરરીતિ આચરવામાં આવે તેવી શંકા વ્યક્ત થઇ રહી છે.તેમાંય જે બે એજન્સીને કામ સોંપવાનું નક્કી કરાયું તે બન્ને એજન્સીએ મ્યુનિ.પાસેથી એજન્સી ચાર્જ પેટે કોઇ રકમ દર્શાવી નથી, જ્યારે અન્ય કેટલીક એજન્સીઓએ દર મહિને જુદા જુદા ચાર્જ દર્શાવ્યા છે.તેના આધારે હાર્દિક કન્સ્ટ્રક્શન તથા ડીઆર એન્ટરપ્રાઇસ નામની બે એજન્સીને બે વર્ષ સુધી સફાઇની કામગીરી સોંપવાની દરખાસ્ત સ્ટે.કમિટીમાં મુકાઇ છે.અત્યાર સુધી કાંકરિયા લેકફ્રન્ટની સફાઇની કામગીરી એ.બી. એન્ટરપ્રાઇઝ નામની એક જ એજન્સી સંભાળતી હતી, પરંતુ મ્યુનિ.સત્તાધીશોએ નવી એજન્સીઓને ચાન્સ આપવાની સાથે સાથે બે એજન્સીઓને સાચવી લઇ બન્નેને કામ વહેંચી આપવાનો વિવાદાસ્પદ નિર્ણય લીધો છે.
કાંકરિયા લેકફ્રન્ટમાં રિક્રીએશન એક્ટિવિટીના નામે દબાણ વધારાયા
કાંકરિયા લેકફ્રન્ટનું નિર્માણ થયું ત્યારથી આજદિન સુધી કાંકરિયા પરિસરમાં રિક્રીએશન એક્ટિવિટી તથા ખાણીપીણીની સુવિધાના નામે દબાણો વધારાયા હોવાનો આક્ષેપ થઇ રહ્યો છે.કાંકરિયામાં ફરવા આવતાં પરિવારોને આરામથી હરવા-ફરવાની કે બેસવાની જગ્યાની અછત વર્તાઇ રહી છે.એટલું જ નહિ, ખાણીપીણીનાં કેટલાય ધંધાર્થીઓ દ્વારા સ્વચ્છતા જાળવવામાં આવતી નથી અને વધારાની જગ્યાનો સદ્ઉપયોગ કરવામાં આવતો હોવાનું કહેવાય છે.
