ધર્મશાલા, તા. 08 મે 2022, રવિવાર : હિમાચલ પ્રદેશ વિધાનસભા ભવનના મુખ્ય દ્વાર પર અને બાઉન્ડ્રી પર ખાલિસ્તાનના ઝંડા લગાવ્યા હોવાનું સામે આવ્યું છે.ધર્મશાલા ખાતે સ્થાનિક લોકોએ સવારે વિધાનસભા ભવનના મેઈન ગેટ પર ખાલિસ્તાનના ઝંડા જોયા બાદ પોલીસને જાણ કરી હતી.ત્યાર બાદ ઘટના સ્થળે પહોંચેલી પોલીસે વિધાનસભાના મુખ્ય દ્વાર પર અને બાઉન્ડ્રી પર લગાવેલા ઝંડા હટાવ્યા હતા.ઉપરાંત વિધાનસભા ભવનની બહારની દીવાલો પર ‘ખાલિસ્તાન’ લખી દીધું હતું જેને પોલીસની ટીમે દૂર કર્યું હતું.પોલીસ હાલ આ હરકત માટે કોણ જવાબદાર હોઈ શકે તે જાણવાની દિશામાં તપાસ કરી રહી છે.જાણવા મળ્યા મુજબ સીસીટીવી ફુટેજના આધારે ખાલિસ્તાનના ઝંડા અને પોસ્ટર લગાવનારા લોકોની ઓળખ કરવામાં આવશે.હાલ આ મુદ્દે સમગ્ર પ્રદેશનું રાજકારણ ગરમાયું છે.
કાંગડાના એસપી ખુશાલ શર્માએ આ મુદ્દે જણાવ્યું કે, ‘બની શકે કે, આજે મોડી રાતે કે સવાર-સવારમાં આ કરવામાં આવ્યું હોય. અમે વિધાનસભા ગેટ પરથી ખાલિસ્તાનના ઝંડા હટાવી લીધા છે.આ પંજાબથી આવેલા કેટલાક પર્યટકોની હરકત હોય તેવી શક્યતા જણાઈ રહી છે.અમે આ મામલે કેસ દાખલ કરવા જઈ રહ્યા છીએ.’આ સપ્તાહની શરૂઆતમાં હિમાચલ પ્રદેશમાં આપના સોશિયલ મીડિયા ઈન્ચાર્જ હરપ્રીત સિંહ બેદીએ ટ્વિટર પર ખાલિસ્તાનના સમર્થનમાં એક બાદ એક એમ અનેક ટ્વિટ કરી હતી.એટલું જ નહીં, તેમણે ખાલિસ્તાનની માગણીને બંધારણીય અધિકાર પણ ગણાવ્યો હતો.જોકે બાદમાં હિમાચલ પ્રદેશ AAP દ્વારા તે મુદ્દે એવી સ્પષ્ટતા કરવામાં આવી હતી કે, હરપ્રીત સિંહ બેદીના વિચારો તેમના અંગત છે.તે પાર્ટીની વિચારધારા વિરૂદ્ધ છે.બેદીને પાર્ટીમાંથી કાઢી મુકવામાં આવ્યા છે.
