ભાવનગર : વિધાનસભાની ચૂંટણી ચાલુ વર્ષના અંતમાં યોજાનાર છે તેથી ચૂંટણી વર્ષ ઇફેકટ ભાવનગર મહાપાલિકામાં જોવા મળી રહી છે.ચૂંટણી વર્ષના પગલે આજે ભાવનગર મહાપાલિકાની સ્ટેન્ડીંગ કમિટિમાં રોડ સહિતના વિકાસના કામોને ધડાધડ મંજુરી આપવામાં આવી હતી.સ્ટેન્ડીંગમાં અધ્યક્ષ સ્થાનેથી જુદા જુદા ૮ ઠરાવને બહાલી આપવામાં આવી હતી. ભાવનગર મહાનગરપાલિકામાં આજે મંગળવારે સાંજે સ્ટેન્ડીંગ કમિટિની બેઠક ચેરમેનના અધ્યક્ષ સ્થાને મળી હતી, જેમાં રૂ. ૧પ.ર૦ કરોડના રોડ સહિતના કામોને મંજુરી આપવામાં આવી હતી.આ બેઠકમાં જુદા જુદા કામના ૪૧ ઠરાવને બહાલી આપવામાં આવી હતી.ચૂંટણી વર્ષના પગલે શહેરના ઘોઘાસર્કલ, સરદારનગર, કાળીયાબીડ, કુંભારવાડા, તખ્તેશ્વર, પીરછલ્લા, ચિત્રા-ફુલસર સહિતના વોર્ડમાં પેવર રોડ, પેવિંગ બ્લોક, આરસીસી રોડ સહિતના કામોને મંજુરી આપવામાં આવી છે.આ કામગીરી આગામી દિવસોમાં શરૂ થશે અને ચૂંટણી આવી રહી હોવાના પગલે આ કામગીરી ઝડપી કરવા શાસક ભાજપના સભ્યોએ સુચના આપી હોવાનુ ચર્ચાય રહ્યુ છે.આ ઉપરાંત ભાવનગર મહાપાલિકાના વર્ગ ૧થી ૪ના અધિકારી-કર્મચારીઓને વર્ષ ર૦રર-ર૩ માટે ગણવેશની રકમ રોકડમાં ચુકવવાની હોય, જે અન્વયે પુરૂષ કર્મચારી માટે બે જોડીના કાપડ તથા સિલાઈ સાથે કુલ રૂ. ૬૬૩ તથા સ્ત્રી માટે રૂ. ૭૦૦ લેખે ભાવનગર મનપાના કુલ પુરૂષ કર્મચારીની સંખ્યા-૧૧પ૧ તથા સ્ત્રી કર્મચારીની સંખ્યા ૭૪૩ હોય જે મુજબ કુલ રૂ. ૧ર,૮ર,પપ૦ રોકડમાં ચુકવવાની મંજુરી આપવા નિર્ણય કરવાનો હતો પરંતુ ગણવેશની રકમમાં વધારો કરી રૂ. ૧પ૦૦ કરવામાં આવી છે.આ તમામ કર્મચારીઓને ગણવેશના રૂ. ૧પ૦૦ આપવામાં આવશે. આ ઉપરાંત મનપાના આરોગ્ય અધિકારી સિન્હાને પણ ગણવેશ આપવા ચેરમેને નિર્ણય કર્યો છે.
સ્ટેન્ડીંગ કમિટિમાં જુદા જુદા ૮ ઠરાવ અધ્યક્ષ સ્થાનેથી કરવામાં આવ્યા હતા, જેમાં ઓલ ઈન્ડીયા કાઉન્સીલ ઓફ મેયર્સમાં ચાલુ વર્ષ ર૦રર-ર૩ માટેની વાર્ષિક સભ્ય ફી રૂ. ર૩,૬૦૦ ભરવા મંજુરી આપવામાં આવી હતી.તરસમીયા ગામમાં બાકી રહેતા તમામ રસ્તાઓનુ મેટલ ગ્રાઉટીંગ કામ રૂ. ૪૪.૦૪ લાખના ખર્ચે, ઘોઘાસર્કલ-અકવાડા વોર્ડમાં વિવિધ રસ્તાઓનુ મેટલ ગ્રાઉટીંગનુ કામ કુલ રૂ. પ૭.૭૪ લાખના ખર્ચે, આ જ વોર્ડમાં અન્ય રોડના મેટલ ગ્રાઉટીંગ કામ કરવા કુલ રૂ. પપ.૦પ લાખના ખર્ચે કરવા મંજુરી આપવામાં આવી હતી. કાળીયાબીડ વોર્ડમાં ભયલુભાઈની વાડીથી વિકટોરીયાની દિવાલને પેરેલલ બોરતળાવ ઈસ્કોન કલબ સુધીના રસ્તાનુ મેટલ ગ્રાઉટીંગ કરવાનુ કામ કુલ રૂ. ૪૭.૬૮ લાખના ખર્ચે કરાશે.
ભાવનગર મનપામાં વિવિધ વિભાગોમાં થતા જુદા જુદા વિકાસના કામોના મેઈનટેનન્સના આઉટ સોસીંગથી સેવાઓ મેળવવાના કે અન્ય કોઈપણ પ્રકારના કામોની ટેન્ડર પ્રક્રીયા હાથ ધરવાની મંજુરી આપવા સ્ટેન્ડીંગમાં નિર્ણય કરાયો છે.મનપાની જુદી જુદી કચેરીઓમાં-બિલ્ડીંગોમાં તથા ઝોનલ ઓફીસોમાં આઉટસોર્સથી શ્રમયોગીની સેવા દ્રષ્ટિ ફેડરેશન પાસેથી ટેન્ડર પ્રક્રિયા પૂર્ણ થતા સુધી સેવાઓ મેળવવા અધ્યક્ષ સ્થાને નિર્ણય કરાયો હતો.
