કોરોનાનો ફફડાટઃ કંપનીઓના પ્લાન્ટના શટ ડાઉન

કોરોના વાયરસ ફેલાતો અટકાવવા અને સ્ટાફની સલામતી માટે સાવચેતીરૂપે પગલાંઃ ઓટો તેમજ સિમેન્ટ કંપનીઓએ તમામ પ્લાન્ટ બંધ કર્યા
એજન્સી, નવી દિલ્હી

દેશભરમાં ઓટોથી લઈને સિમેન્ટ અને કન્ઝ્યુમર ઈલેક્ટ્રોનિક્સ અને એપ્લાયન્સસીસ સહિતના વિવિધ સેક્ટરમાં શટડાઉન થઈ ગયું છે. ઓટો ઉત્પાદકો અને ઓટો કમ્પોનન્ટ ઉત્પાદકોએ ભારત અને વિદેશોમાં તેમના પ્લાન્ટ ધડાધડ બંધ કરી દેવાની જાહેરાત કરી છે. કોરોના વાયરસનું સંકટ ધ્યાનમાં લઈને સ્ટાફ તથા તમામ સંબંધિત લોકોની સલામતી અને સાવચેતીના ભાગરૂપે આ પગલું લેવાયું છે. કિયા મોટર્સ, લક્ઝુરી કાર ઉત્પાદક BMW અને ફ્રાન્સની ઓટો ઉત્પાદક રેનો, બજાજ ઓટો, ટીવીએસ મોટર, મિન્ડા ઈન્ડસ્ટ્રીઝ સહિતની કંપનીઓએ સોમવારથી હંગામી ધોરણે તેમનું ઉત્પાદન બંધ કરી દીધું છે. સિમેન્ટ ઉત્પાદક ઈન્ડિયા સિમેન્ટે પણ તેના વિવિધ પ્લાન્ટ બંધ કરી દીધા છે.

મારુતિ સુઝુકી, મહિન્દ્રા એન્ડ મહિન્દ્રા, હિરો મોટોકોર્પ, ફિયાટ જેવી કંપનીઓએ તેમના પ્લાન્ટ બંધ કરવાની જાહેરાત રવિવારે કર્યા બાદ સોમવારે સોસયટી ઓફ ઈન્ડિયન ઓટોમોબાઈલ મેન્યુફેક્ચરર્સ(સિયામ) અને ઓટો કમ્પોનન્ટ મેન્યુફેક્ચરર્સ ઓસોસિએશન ઓફ ઈન્ડિયા(ACMA) બન્નેએ તેમના તમામ સભ્યો(કંપનીઓ)ને પ્લાન્ટ શટડાઉન કરી દેવાની અપીલ કરી હતી, જેને પગલે અનેક કંપનીઓ સોમવારે જ તેમના પ્લાન્ટ શટડાઉનની જાહેરાત કરી દીધી હતી.

સિયામની આ અપીલ સાથે જ ટુ વ્હીલર ઉત્પાદક બજાજ ઓટોએ સોમવારે જાહેરાત કરી હતી કે તેના તમામ મેન્યુફેક્ચરિંગ પ્લાન્ટ ખાતે ઉત્પાદન સ્થગિત કરી દેવાયું છે. કંપનીએ કહ્યું હતું કે સ્ટાફ માટે વર્ક ફ્રોમ હોમની નીતિ અમલી બનાવી છે અને ઈન્ટરનેશનલ ટ્રાવે તથા ફિઝિકલ મીટિંગ રદ કરી દેવાયા છે. બજાજના ચકાન ખાતેના પ્લાન્ટ અને અન્ય ફેક્ટરીમાં ઉત્પાદન બંધ કરી દેવાયું છે. કંપનીએ કહ્યું હતું કે સરકાર કોરોના વાયરસને કાબુમાં લેવા માટે જે કંઈ આદેશ કરશે તેનું કંપની સંપૂર્ણ પાલન કરશે. ચકાન ઉપરાંત પુણેમાં અકુરડી, ઔરંગાબાદ નજીક વાલુજ અને ઉત્તરાખંડમાં પંતનગર ખાતે તેના પ્લાન્ટ બંધ કરી દેવાયા છે. ટીવીએસ મોટરે પણ ભારતમાં તેના તમામ પ્લાન્ટ અને ઈન્ડોનેશિયામાં પણ તેનો પ્લાન્ટ બંધ કરી દેવાની જાહેરાત કરી છે.

એ જ રીતે બીએમડબ્લ્યુ ગ્રુપે જાહેરાત કરી છે કે તેનો ચેન્નઈ સ્થિત પ્લાન્ટ 31મી સુધી બંધ રહેશે. કિયા મોટર્સ ઈન્ડિયાએ પણ અસાધારણ પરિસ્થિતિને ધ્યાનમાં લઈને અને સ્ટાફની સલામતી માટે તમામ ઓપરેશન્સ સ્થગિત કરવાની જાહેરાત કરી હતી. રેનો ઈન્ડિયાએ પણ હાલપૂરતું તેના તમામ ઓપરેશન્સ સ્થગિત કરી દીધા છે. યામાહા ઈન્ડિયાએ પણ ચેન્નઈ, સુરજપુર(ઉત્તર પ્રદેશ) અને ફરિદાબાદ(હરિયાણા) ખાતેના તેના પ્લાન્ટમાં ઉત્પાદન 31 માર્ચ સુધી સ્થગિત કરી દીધું છે.
દરમિયાન ભારત ફોર્જ અને મિન્ડા ઈન્ડસ્ટ્રીઝે પણ સોમવારે કહ્યું હતું કે તેમણે સાવચેતીના ભાગરૂપે તેમના તમામ મેન્યુફેક્ચરિંગ લોકેશન્સ ખાતે કામગીરી સ્થગિત કરી દીધી છે. મિન્ડાએ ઉત્તર ભારત, રાજસ્થાન અને મહારાષ્ટ્રમાં તેના મેન્યુફેક્ચરિંગ ઓપરેશન્સ બંધ કરી દીધા છે. ભારત ફોર્જે પણ કહ્યું છે કે 23થી 31 માર્ચ સુધી તેના તમામ પ્લાન્ટમાં કામગીરી સ્થગિત કરી દેવાઈ છે.

સિયામના પ્રેસિડેન્ટ રાજન વાઢેરાએ કહ્યું હતું કે ઓટો અને ઓટો કમ્પોનન્ટ બનાવતી તમામ કંપનીઓને વર્તમાન પરિસ્થિતિને ધ્યાનમાં લઈને તેમનું ઉત્પાદન બંધ કરી દેવા માટે અપીલ કરવામાં આવી છે, જેથી તેમાં કામ કરતા શ્રમિકો અને અન્ય સ્ટાફને કોરોના વાયરસ સામે રક્ષણ મળે અને આ વાયરસ ફેલાતો અટકાવી શકાય. સિયામના મુદ્રાલેખ ‘રાષ્ટ્રનિર્માણ, જવાબદારીપૂર્વક(બિલ્ડિંગ ધ નેશન, રિસ્પોન્સિબલી)’ને અનુરૂપ આ અપીલ કરવામાં આવી હતી.

દરમિયાન ઈન્ડિયા સિમેન્ટ્સે પણ જાહેરાત કરી છે કે તેણે તમિલનાડુ, આંધ્ર પ્રદેશ, તેલંગણા, રાજસ્થાન અને મહારાષ્ટ્રમાં તેના તમામ સિમેન્ટ પ્લાન્ટમાં શટડાઉન જાહેર કરી દીધું છે. સરકારની ગાઈડલાઈનને અનુસરીને સ્ટાફની સલામતી માટે કંપનીએ આ જાહેરાત કરી હતી.

ઉલ્લેખનીય છે કે મારુતિ સુઝુકી, તાતા મોટર્સ, હ્યુન્ડઈ, ટોયોટા કિર્લોર્સકર મોટર અને હિરો મોટોકોર્પે હાલપૂરતું તેમનું ઉત્પાદન બંધ કરી દેવાની અગાઉ જાહેરાત કરી જ દીધી છે. દેશની સૌથી મોટી પેસેન્જર કાર ઉત્પાદક મારુતિએ ગુરુગ્રામ અને માનેસર ખાતેના તેના પ્લાન્ટમાં તાત્કાલિક અસરથી ઉત્પાદન બંધ કરી દીધું અને ક્યાં સુધી બંધ રહેશે તે હવે પછી તે જાહેર કરશે. કંપનીએ કહ્યું હતું કે રોહતક ખાતે તેનું રિસર્ચ અને ડેવલપમેન્ટ સેન્ટર પણ બંધ રહેશે. માનેસર અને ગુરુગ્રામ બન્ને પ્લાન્ટમાં વર્ષે 15.5 લાખ વાહનોનું ઉત્પાદન થાય છે. મહિન્દ્રા એન્ડ મહિન્દ્રાએ પણ રવિવારે કહ્યું હતું કે કોરોના વાયરસને પગલે કર્મચારીઓની સલામતી માટે તેણે મહારાષ્ટ્રમાં નાગપુર ખાતેના મેન્યુફેક્ચરિંગ પ્લાન્ટમાં ઉત્પાદન હાલપૂરતું બંધ કરી દીધું છે.

આદિત્ય બિરલા ફેશનના તમામ સ્ટોર્સ 31મી સુધી બંધ

આદિત્ય બિરલા ફેશન એન્ડ રિટેલ લિમિટેડ (ABFRL)એ સોમવારે કહ્યું હતું કે કોરોના વાયરસને પગલે ઊભી થયેલી પરિસ્થિતિને પગલે સ્ટાફની સલામતીનું ધ્યાન રાખીને કંપનીએ તેના તમામ રિટેલ સ્ટોર્સ 31 માર્ચ સુધી બંધ રાખવાનો નિર્ણય લીધો છે. તેણે આ ઉપરાંત કર્ણાટક, તમિલનાડુ, ઓડિશામાં તેના ફેક્ટરી ઓપરેશન્સ પણ બંધ કરી દીધા છે. સ્ટોરના કર્મચારીઓ અને ગ્રાહકો તમામની સલામતીને ધ્યાનમાં લઈને કંપનીએ આ નિર્ણય લીધો હતો.

કન્ઝ્યુમર ઈલેક્ટ્રોનિક્સ ઉત્પાદકોએ પણ ઉત્પાદન 31મી સુધી બંધ કર્યું

કન્ઝ્યુમર ઈલેક્ટ્રોનિક્સ અને એપ્લાયન્સ ઉત્પાદકો સેમસંગ, એલજી, પાનાસોનિક અને ગોદરેજ એપ્લાયન્સીસે તેમનું ઉત્પાદન 31મી સુધી બંધ કરી દેવાની જાહેરાત કરી છે. 31મી આસપાસ આ કંપનીઓ સ્થિતિની સમીક્ષા કરશે અને સરકારની નીતિ અનુસાર આગળની જાહેરાત કરશે. સાઉથ કોરિયાની કંપની સેમસંગે નોઈડા અને ચેન્નઈ સ્થિત પ્લાન્ટ બંધ કરી દીધા છે. તે મોબાઈલ ફોન, રેફ્રિજરેટર, વોશિંગ મશીન, વગેરે પ્રોડક્ટ્સનું ઉત્પાદન કરે છે. જાપાનીઝ કંપની પાનાસોનિકે પણ ભારતમાં તેના તમામ યુનિટ્સનું ઉત્પાદન બંધ કરી દીધું છે. હરિયાણામાં જઝ્ઝર ખાતે તેનો સૌથી મોટો પ્લાન્ટ છે. તે એસી, રેફ્રિજરેટર, ઓડિયો પ્રોડક્ટ્સ બનાવે છે. એલજી ઈલેક્ટ્રોનિક્સે પણ ગ્રેટર નોઈડા અને પુણે ખાતેના પ્લાન્ટ બંધ કરી દીધા છે. હાયર એપ્લાયન્સીસે પણ પુણેનો પ્લાન્ટ બંધ કરી દીધો છે. ગોદરેજ એપ્લાયન્સીસે મોહાલી (પંજાબ), શિરવાલ (મહારાષ્ટ્ર) ખાતેના પ્લાન્ટમાં શટડાઉન જાહેર કર્યું છે. તેણે 22મીની મધરાતથી 31 માર્ચ સુધી આ શટડાઉન જાહેર કર્યું છે. ચીનની કંપની શાઓમી ભારતમાં કોન્ટ્રેક્ટ મેન્યુફેક્ચરર્સ પાસેથી તેની ડિવાઈસીસ તૈયાર કરાવે છે. તેણે કહ્યું કે તેના પાર્ટનર્સને સરકારની જાહેરાત અનુસાર શટડાઉન કરવા કહેવાયું છે.