સુરત, ૨૭ ઓગસ્ટ ૨૦૨૬ : સુરત મહાનગરપાલિકાની સામાન્ય સભામાં સત્તાધારી ભાજપના કોર્પોરેટર કાવ્યા કથીરિયાએ વરાછા વિસ્તારમાં અસામાજિક તત્વો અને ગેરકાયદે દબાણોની સમસ્યા અંગે રજૂઆત કરી હતી.તેમના જણાવ્યા મુજબ, વિસ્તારમાં રસ્તાની બંને બાજુ વધેલા દબાણોને કારણે વાહનચાલકો અને રાહદારીઓને મુશ્કેલી પડી રહી છે,જ્યારે કેટલાક વિસ્તારોમાં અસામાજિક તત્વોના અડ્ડા હોવાની પણ ફરિયાદ છે.
કાવ્યા કથીરિયાએ સામાન્ય સભામાં જણાવ્યું હતું કે વરાછા રોડ પર ધારૂકા કોલેજથી ચીકુવાડી સુધીનો માર્ગ દબાણોના કારણે સતત સાંકડો બની રહ્યો છે. રસ્તાની બંને તરફ ફૂટપાથ પરની લારીઓ, શાકભાજીની લારીઓ સહિતના વિવિધ દબાણોના કારણે વાહનવ્યવહારને અસર થઈ રહી છે.
દબાણોના કારણે ટ્રાફિકની સમસ્યા
વરાછા વિસ્તારમાં વધતા દબાણોના કારણે માર્ગ પર અવરજવર મુશ્કેલ બની રહી છે.વાહનચાલકોને વારંવાર ટ્રાફિકની સમસ્યાનો સામનો કરવો પડે છે જ્યારે રાહદારીઓ માટે પણ સલામત રીતે પસાર થવામાં મુશ્કેલી ઊભી થઈ રહી છે.
કોર્પોરેટરે અગાઉ પણ રજૂઆત કરી હતી
આ સમસ્યાને લઈને કાવ્યા કથીરિયાએ ૫ જુલાઈએ પોલીસ કમિશનરને પત્ર લખી સાત દિવસમાં કડક અને કાયમી કાર્યવાહી કરવાની માંગ કરી હતી. સમયમર્યાદામાં કાર્યવાહી ન થાય તો સ્થાનિક લોકો સાથે મળીને દબાણો સામે સ્વયંભૂ કાર્યવાહી કરવાની ચીમકી પણ આપવામાં આવી હતી.જોકે રજૂઆત બાદ પણ સમસ્યાનો સંપૂર્ણ ઉકેલ ન આવતાં સામાન્ય સભામાં ફરીથી આ મુદ્દો ઉઠાવવામાં આવ્યો હતો.
અસામાજિક તત્વોના અડ્ડા હોવાની પણ રજૂઆત
કોર્પોરેટરે તેમના વિસ્તારમાં માથાભારે તત્વો દ્વારા દબાણ કરવામાં આવતું હોવા ઉપરાંત અસામાજિક તત્વોના અડ્ડા હોવાની પણ રજૂઆત કરી હતી.આ અંગે પોલીસ અને પાલિકા તંત્ર દ્વારા સંકલન કરીને જરૂરી કાર્યવાહી કરવામાં આવે તેવી માંગ કરવામાં આવી છે.સત્તાપક્ષના કોર્પોરેટરની રજૂઆત બાદ હવે વરાછા વિસ્તારમાં દબાણો અને કાયદો-વ્યવસ્થાને લગતી ફરિયાદો સામે તંત્ર કઈ કાર્યવાહી કરે છે તેના પર સ્થાનિક લોકોની નજર રહેશે.
