મુંબઈ : નાણાકીય સંકટમાં મુકાયેલી દિવાન હાઉસિંગ ફાઈનાન્સ લિમિટેડ (DHFL)ને હસ્તગત કરવા માટે અદાણી ગ્રુપ અને પિરામલ એન્ટરપ્રાઈસીસ સહિત ચાર એન્ટિટીએ બિડકરી છે. DHFL હાલ ઈન્સોલ્વન્સી પ્રક્રિયા હેઠળ છે. આ ઉપરાંત અમેરિકા સ્થિત ઓકટ્રી અને હોંગકોંગ સ્થિત એસસી લોવીએ પણ તેમની બિડ 17મીએ સબમિટ કરી છે. 17મી છેલ્લી તારીખ હતી. દરમિયાન ચાર બિડરની જાહેરાતને પગલે ડીએચએફએલનો શેર સોમવારે ઉછળી ગયો હતો અને તેમાં 10 ટકાની ઉપલી સર્કિટ લાગી હતી. તેનો ભાવ ~13.87 પર બંધ રહ્યો હતો.
રિઝર્વ બેન્કે ગત નવેમ્બર મહિનામાં DHFLને ઈન્સોલ્વન્સી પ્રક્રિયા માટે નેશનલ કંપની લો ટ્રિબ્યુનલ (NCLT)ને રિફર કરી દીધી હતી. એનસીએલટીમાં જનારી તે સૌપ્રથમ ફાઈનાન્સ કંપની હતી. આરબીઆઈએ તેના માટે સેક્શન 227 હેઠળ વિશેષ અધિકારનો પ્રયોગ કર્યો હતો. સૂત્રોએ કહ્યું હતું કે ઓકટ્રીએ સંપૂર્ણ કંપની માટે બિડ સબમિટ કરી છે અને બિડ વેલ્યૂ ~20,000 કરોડ છે. કંપની પર ~95,000 કરોડનું દેવું છે અને તેની પાસે ~10,000 કરોડની કેશ છે. આમ જો ઓકટ્રીની બિડ સ્વીકારી લેવાય તો એસબીઆઈની આગેવાનીમાં બેન્કોએ ~65,000 કરોડ માંડવાળ કરવા પડશે.
અદાણી ગ્રુપે DHFLના ~40,000 કરોડના હોલસેલ અને ~3000 કરોડના સ્લમ રિહેબિલિટેશન ઓથોરિટી પોર્ટફોલિયો માટે બિડ કરી હોવાનું સૂત્રોએ કહ્યું હતું. પિરામલ એન્ટરપ્રાઈસીસે DHFLના રિટેલ પોર્ટફોલિયો માટે બિડકરી છે. તેણે આ બિઝનેસ માટે ~12,000કરોડ દર્શાવ્યા છે અને તેના પર 18% યીલ્ડ માગી રહી છે. બેન્કર્સના મતે એસસી લોવીએ અનેક શરતો સાથે બિડ કરી છે, જે ખાસ ગણતરીમાં લેવાય તેવી શક્યતા નથી. NCLT મારફતે DHFLના રેઝોલ્યૂશનથી બેન્કોને ~60,000 કરોડ જેવી રકમ માંડવાળ કરવાનો વારો આશે. મતલબ કે તેમની આટલી એનપીએ વધી જશે. જુલાઈ 2019ના અંતે DHFLએ બેન્કો, નેશનલ હાઉસિંગ બોર્ડ, મ્યુચ્યુઅલ ફંડ્સ, બોન્ડહોલ્ડર્સને ~83,873 ચૂકવવાના બાકી હતા.
