બંગાળની ખાડી બાદ હવે કેરલથી અરબ સાગર વચ્ચે એક સાઇક્લોન સિસ્ટમ સેટ થઇ ગઇ છે.વિતેલા બે દિવસથી અરબ સાગરમાં ડેવલપ થઇ રહેલા આ સાયક્લોનને લઇને હવામાન વિભાગ અને ફોરકાસ્ટ સાયન્ટિસ્ટ સતત નજર રાખી રહ્યા છે.ગઇકાલ સુધી સાઇક્લોન અરબ સાગરથી આગળ વધી સાઉદી અરબ તરફ ફંટાય તેવી સંભાવના વ્યક્ત કરાઇ હતી પરંતુ 24 કલાક દરમિયાન ફરી અરબ સાગરમાં સાઇક્લોને દિશા બદલી છે અને હવે આ સાઇક્લોન સુરત જિલ્લા તરફ આગળ ધપી રહ્યું છે.
વિતેલા 4 દિવસથી સુરત શહેરમાં સૂસવાટા મારતો પવન ફુંકાઇ રહ્યો છે.આજે પણ સાઉથ વેસ્ટની દિશા સાથે 11 કિલોમીટરની ઝડપે પવન ફુંકાતો હતો.વળી,મંગળવારે સુરત શહેરમાં તાપમાનનો પારો ગઇકાલની સરખામણીમાં બે ડિગ્રી નીચે ઊતરી 39 ડિગ્રી સેલ્સિયસ નોંધાયું છે.તેવી જ રીતે શહેરનું લઘુત્તમ તાપમાન 28 ડિગ્રી નોંધાયું હતું.જો સુરતમાં સાઇક્લોનની અસરને પગલે વહેલો વરસાદ આવશે તો કેરીના પાકને વ્યાપક નુકસાન થશે.હાલ પણ પવનની પગલે આંબા ઉપરથી કેરી ઝુડાઇ રહી હોવાની માહિતી જાણવા મળી છે.આગામી 3 જુન આસપાસ સુરત સહિત સમગ્ર દક્ષિણ ગુજરાતમાં વરસાદની આગાહી કરવામાં આવી રહી છે.
ત્રણ વર્ષ પહેલાં ઓખી વાવાઝોડું પણ સુરતને ટકરાય તેવી ભીતિ હતી, પરંતુ દરિયામાં જ સમી ગયેલું
આજથી ત્રણ વર્ષ પહેલાં સુરત શહેર સહિત સમગ્ર દક્ષિણ ગુજરાતના સમુદ્રતટિય વિસ્તારમાં ઓખી વાવાઝોડાની આગાહી હતી.100 કિમીની ઝડપે પવન ફુંકાવા સાથે ઓખી સુરતને હિટ કરે તેવી આગાહી અપાઈ હતી. અને આ દરમિયાન સાઇક્લોનની અસરને કારણે સુરત શહેર સહિત સમગ્ર દક્ષિણ ગુજરાતમાં આબોહવાકીય ફેરફારો જોવા મળ્યા હતા.સુરત શહેરમાં ઓખી વખતે તાપમાન ઠંડુંગાર થઈ ગયું હતું પરંતુ ઓખી દરિયામાં જ સમી ગયું હતું.
