ભાજપ સાંસદ અને અભિનેત્રી કંગના રણૌત તથા યોગગુરુ બાબા રામદેવ વચ્ચેનો શાબ્દિક વિવાદ વધુ તીવ્ર બન્યો છે.કંગનાના તાજેતરના નિવેદન બાદ બાબા રામદેવે તેમના ભૂતકાળ અંગે ટિપ્પણી કરી હતી.હવે કંગનાએ પણ વળતો જવાબ આપતાં બાબા રામદેવના વ્યવસાય અને અગાઉના વિવાદોનો ઉલ્લેખ કર્યો છે.
કંગનાએ એક મુલાકાત દરમિયાન બાબા રામદેવની ટિપ્પણીનો જવાબ આપતાં સવાલ કર્યો હતો કે, શું બાબા રામદેવ મારા રૂમમાં ચામાચીડિયાની જેમ ઊંધા લટકતા હતા? તેમણે બાબા રામદેવને તેમના અંગત જીવન અંગે ટિપ્પણી ન કરવાની સલાહ આપતાં તેમના વ્યવસાયિક પ્રવૃત્તિઓ અંગે પણ સવાલો ઉઠાવ્યા હતા.
યોગ અને આયુર્વેદથી લઈને વસ્ત્રોના વ્યવસાય સુધીની વાત
કંગનાએ બાબા રામદેવના સ્વદેશી અભિયાન અને તેમની વ્યવસાયિક સફરનો ઉલ્લેખ કરતાં કહ્યું હતું કે શરૂઆતમાં યોગ અને આયુર્વેદ સાથે જોડાયેલી પ્રવૃત્તિઓ પર ભાર મૂકવામાં આવ્યો હતો,પરંતુ બાદમાં તેમના વ્યવસાયનો વિસ્તાર વિવિધ ઉપભોક્તા ચીજવસ્તુઓ સુધી થયો.કંગનાએ ખાસ કરીને વસ્ત્રોના વ્યવસાયનો ઉલ્લેખ કરીને બાબા રામદેવની વિચારધારા અને તેમના વ્યાપારી વિસ્તરણ વચ્ચેના સંબંધ અંગે સવાલ ઉઠાવ્યો હતો.
વિવાદની શરૂઆત કંગનાના નિવેદનથી
આ શાબ્દિક ટકરાવની શરૂઆત કંગના રણૌતના યુવા પેઢી અંગેના નિવેદનથી થઈ હતી.કંગનાએ એક વિરોધ પ્રદર્શન દરમિયાન કેટલાક પ્રદર્શનકારીઓ માટે વાંધાજનક શબ્દપ્રયોગ કર્યો હતો.ત્યારબાદ તેમણે સ્પષ્ટતા કરી હતી કે તેમની ટિપ્પણી સમગ્ર યુવા પેઢી માટે નહોતી,પરંતુ ચોક્કસ લોકોના વર્તનને લઈને હતી.આ નિવેદન બાદ બાબા રામદેવે કંગનાના ભૂતકાળ અને તેમના અંગત જીવન અંગે ટિપ્પણી કરી હતી.તેમણે કંગનાના નિવેદન સામે વાંધો વ્યક્ત કરતાં તેમની રાજકીય પાર્ટીએ પણ આ બાબતને ગંભીરતાથી લેવી જોઈએ તેવી ટિપ્પણી કરી હતી.
કંગનાએ અંગત ટિપ્પણીનો આપ્યો જવાબ
બાબા રામદેવની ટિપ્પણી બાદ કંગનાએ સામાજિક માધ્યમ પર જવાબ આપ્યો હતો.તેમણે બાબા રામદેવને પોતાના અંગત જીવન અને શયનખંડ અંગે કલ્પનાઓ કરવાનું બંધ કરવાની ટકોર કરી હતી.કંગનાએ આ સાથે બાબા રામદેવ સાથે જોડાયેલા અગાઉના વિવાદોનો પણ ઉલ્લેખ કર્યો હતો.ખાસ કરીને પતંજલિની કેટલીક જાહેરાતોમાં કરવામાં આવેલા આરોગ્ય સંબંધિત દાવાઓને લઈને થયેલી અદાલતી કાર્યવાહી તરફ તેમણે ઈશારો કર્યો હતો.
પતંજલિ મામલે સુપ્રીમ કોર્ટની કાર્યવાહીનો સંદર્ભ
પતંજલિની કેટલીક ઔષધીય અને આરોગ્યસંબંધિત જાહેરાતોને લઈને બાબા રામદેવ અને પતંજલિ સામે અગાઉ સુપ્રીમ કોર્ટમાં કાર્યવાહી થઈ હતી.અદાલતે ભ્રામક જાહેરાતો અંગે કડક વલણ અપનાવ્યું હતું અને કંપની તથા તેના સંચાલકોને જવાબદાર ઠેરવતી કાર્યવાહી પણ થઈ હતી.હાલ કંગના અને બાબા રામદેવ વચ્ચે ચાલી રહેલી આ શાબ્દિક ટકરારમાં બંને તરફથી જાહેર નિવેદનો સામે આવી રહ્યાં છે.
