એજન્સી, દિલ્હી
ગૃહમંત્રી અમિતભાઇ શાહે ડોક્ટરોની સુરક્ષા સુનિશ્ચિત કરવા માટે દિલ્હી પોલીસ વડા સાથે વાતચીત કરી હતી. ગૃહમંત્રીએ આ વાતચીત એઇમ્સના રેસિડેન્ટ ડોક્ટર્સ એસોસિએશન દ્વારા લખવામાં આવેલા પત્ર બાદ કરી હતી. જે પત્રમાં જાણકારી હતી કે ડોક્ટર્સ અને નર્સને મકાન માલિકો બહાર કાઢી રહ્યા છે.
કેન્દ્રીય ગૃહમંત્રી અમિતભાઇ શાહે દિલ્હી પોલીસ વડાને તે મકાન માલિકો સામે કડક કાર્યવાહી કરવા માટે સૂચના આપી છે. મકાન માલિકો જે કોરોનાના દર્દીઓની સારવાર કરી રહ્યા છે તેવા ડોક્ટરોને તથા નર્સોને મકાન ખાલી કરવા માટે કહી રહ્યા છે.
નોંધનીય છે કે, અખિલ ભારતીય આયુર્વિજ્ઞાન સંસ્થાના રેસિડેન્ટ ડોક્ટર્સ એસોશિએશને ગૃહમંત્રી અમિત શાહને પત્ર લખીને જાણ કરી હતી કે લોકો હેલ્થકેર પ્રોફેશનલ્સને પોતાના ઘરની બહાર કાઢી રહ્યા છે. આ પત્રમાં તેમને ડોક્ટર્સ માટે પરિવહન સુવિધા માટે જોગવાઈ કરવાની અને મકાન માલિકો સામે ઉચિત કાર્યવાહી કરવા માટે જણાવ્યું હતું.
